Manuel H. Bernabe

Isang premyadong makata sa wikang Espanyol si Manuel H. Bernabe (Man·wél Bér·na·bé). Ulit-ulit din siyang kinilala sa kahusayan niya sa pagsasalin ng mga akdang pampanitikan.

Naging guro siya sa wikang Espanyol, peryodista, at naglingkod sa Kamara de Representante (Mababang Kapulungan ng Kongreso) noong 1931.

Ipinanganak si Bernabe noong 17 Pebrero 1890 sa Paranaque, Rizal. Sina Timoteo Bernabe at Emilia Hernandez ang kaniyang magulang.

Nag-aral siya sa Ateneo de Manila, at isa sa mga gawain niya dito ang pagsasalin sa Aeneid ni Virgil. Matapos sa Ateneo, kumuha siya ng abogasya sa Unibersidad ng Santo Tomas.

Pagkagradweyt, pumasok si Bernabe sa pahayagang La Democracia, at pagkatapos ay sa La Vanguardia bago siya naging kontribyutor ng Excelsior. Nagturo siya ng Espanyol sa iba’t ibang pamantasan, kasama na rito ang Unibersidad ng Pilipinas, Far Eastern University, at Unibersidad ng Santo Tomas. Pinarangalan siya sa UST bilang pinakamahusay na makata sa Espanyol noong 1950.

Ngunit, noon pang 1913, napanalunan na niya ang tatlong parangal mula sa tatlong magkakaibang organisasyon dahil sa mga akda niyang Himno al Sagrado Corazon de Jesus, El Zapote, at España en Filipinas.

Noong 1924, napanalunan niya ang parangal na Premio Zobel nang isalin niya ang akdang La Pugna. Nagwaging muli ni Bernabe sa nasabing timpalak noong 1926 dahil sa salin niya ng Rubaiyat. Pinarangalan siyang “Hari ng Balagtasan sa wikang Espanyol” noong 1927 at nakalaban si Jesus Balmori.

Tinipon niya ang mga sariling tula sa Cantos del Tropico (1929). Nakamit ni Bernabe ang dalawang karangalan mula sa Espanya. Dahil sa kaniyang pagpupunyaging gamitin ang wikang Espanyol bílang midyum ng pagsulat, iginawad sa kaniya ang parangal na El Yugo y las Flechas (1940) at sinundan ito ng parangal na Orden de Isabela la Catolica (1953).

Nang maitalagang pinuno ng Pambansang Aklatan noong dekada 50, isinalin ni Bernabe ang mga sinulat ni Marcelo H. Del Pilar sa wikang Tagalog. Namatay si Bernabe noong 29 Nobyembre 1960.

Pinagmulan: NCCA Official | Flickr

Mungkahing Basahin: