Paulino Dizon

Sino si Paulino Dizon?

Unang Filipino na nahirang na katuwang na awditor sa Filipinas ni Pangulong Woodrow Wilson ng Estados Unidos at naging Insular Auditor noong 1919 sa edad na 28 taon.

Isinilang si Paulino S. Dizon (Paw·lí·no Es Dí·zon) sa Porac, Pampanga noong 5 Enero 1891.

Nag-aral siya sa paaralang publiko ng Porac ngunit lumuwas ng Maynila upang humanap ng trabaho habang nag-aaral sa gabi. Pumasok siya sa Liceo de Manila, nakapasa sa examen ng serbisyo sibil sa gulang na 18 taon, at nahirang na klerk sa Bureau of Audit noong 1909.

Hinahangaan si Dizon sa sipag at dedikasyon sa trabaho. Sinasabing siya ang pinakamaagang pumasok sa opisina at ginagawa ang trabaho hanggang gabi. Kapag may sakit, hinihiling din niya sa asistant na dalhin sa bahay niya ang mga papeles upang maiwasan ang anumang atraso.

Kahit hindi nakatapos ng pag-aaral, pinagtiwalaan siya dahil sa kaniyang integridad at debosyon sa tungkulin. Noong 1919, inirekomenda siya ng gobernador-general na Amerikano para maging deputy auditor. Noong 7 Nobyembre 1945 at muling itinatatag ang pamahalaang Filipino, hinirang siya ni Pangulong Osmeña na Auditor General ng bansa.

Humawak din si Dizon ng ibang tungkulin, gaya ng presidente ng Manila Railroad Company, presidente ng Manila Hotel Company at Cebu Portland Cement, at sekretaryo ng Manila Harbor Board.

Huwaran siya para sa sinumang nasa serbisyo publiko, lalo na sa kaniyang pahayag na “Ang pagdudulot ng pinakamataas na paglilingkod sa aking bayan ang kaligayahan ko sa buhay.”

Pagkaraan ng dalawang taon bilang Auditor General ay namatay siya sa isang mabigat na karamdaman noong 30 Hunyo 1947. Naiwan niya ang maybahay na si Gertrudiz Henson at mga anak na sina Sierve, Purita, at Aurelio.

Pinagmulan: NCCA Official | Flickr

Mungkahing Basahin: